തന്‍റെ ശരീരത്തെ കുറിച്ച് ആളുകള്‍ പറഞ്ഞിരുന്ന കാര്യങ്ങളെല്ലാം മാനസികമായി തളര്‍ത്തിയിരുന്നുവെന്ന് നടി പാര്‍വതി തിരുവോത്ത്.
അത്തരം അഭിപ്രായങ്ങളും പരിഹാസങ്ങളും ബുളീമിയ എന്ന അവസ്ഥയിലേക്ക് തന്നെ എത്തിച്ചെന്നും പാര്‍വതി ഇന്‍സ്റ്റഗ്രാമില്‍ കുറിച്ചു.
അമിത ഭാരത്തെക്കുറിച്ചും ശരീരപ്രകൃതിയെക്കുറിച്ചും അമിത ആശങ്കയുള്ളവരിൽ കാണുന്ന രോഗമാണ് ബുളീമിയ.
ഞാന്‍ വര്‍ഷങ്ങളോളം എന്‍റെ ചിരി അടക്കിപ്പിടിച്ചിട്ടുണ്ട്. എന്‍റെ കൂടെ ജോലി ചെയ്തിരുന്ന പലരും ചിരിക്കുമ്പോള്‍ കവിളുകള്‍ വലുതാകുന്നതിനെ കുറിച്ച് പറയുമായിരുന്നു.
എനിക്ക് നല്ല ആകൃതിയിലുള്ള ഭംഗിയുള്ള താടിയില്ലെന്നും പറഞ്ഞിട്ടുണ്ട്. അതുകൊണ്ട് ഞാന്‍ ചിരിക്കുന്നതു തന്നെ നിര്‍ത്തി.
ജോലി സ്ഥലത്തും പുറത്ത് ഏതെങ്കിലും പരിപാടിക്കു പോയാലുമെല്ലാം ഞാന്‍ തനിച്ചു ഭക്ഷണം കഴിക്കാന്‍ തുടങ്ങി.
കാരണം, ഞാന്‍ എടുക്കുന്ന ഭക്ഷണത്തിന്‍റെ അളവിനെ കുറിച്ച് പലപ്പോഴും ആളുകള്‍ കമന്‍റ് ചെയ്യും. ആളുകള്‍ പറയുന്നതെല്ലാം തന്നെ ഞാന്‍ എന്‍റെ മനസിലേക്ക് എടുക്കുകയും സ്വയം അത്തരം കമന്‍റുകള്‍ പറയാനും തുടങ്ങി.
വൈകാതെ തന്നെ ഞാന്‍ ബുളീമിയയുടെ തീവ്രമായ അവസ്ഥയിലേക്ക് എത്തിപ്പെട്ടു. അതില്‍ നിന്നും പുറത്തുവരാന്‍ എനിക്ക് വര്‍ഷങ്ങളുടെ പ്രയത്‌നം വേണ്ടിവന്നു.
സുഹൃത്തുക്കളുടെയും, ഫിറ്റ്‌നസ് കോച്ചിന്‍റെയും, തെറാപ്പിസ്റ്റിന്‍റെയും സഹായത്തോടെ ഞാന്‍ വീണ്ടും തുറന്ന് ചിരിക്കാന്‍ തുടങ്ങി.- പാർവതി കുറിച്ചു.
